येशील ना रे...... ???

 

मनातील वादळ दिवसेन दिवस वाढतच चालले आहे. आणि तुझ्याबद्दल मनातील प्रेम आणि राग सुद्धा ..

का छळतोस मला किती त्रास देशील... मनातील प्रेम खूप जपून ठेवतेय  रे मी फक्त तुझ्यासाठी पण तू मात्र किती कठोर  आहेस रे......कुठे आहेस तू...  

तू कोण आहेस ? कसा दिसतोस ?? काय करतोस ? मला काही माहित नाही पण हे मात्र विधिलिखित आहे कि

तू माझ्या आयुष्याचा  एक भाग आहेस.....माझ्या आयुष्याची पहाट आहेस...  एक प्रसन्न  सकाळ....एक कोरडी दुपार.. एक सोनेरी संध्याकाळ अन चंदेरी रात्र आहेस..... 

प्रत्येक संध्याकाळ तुझ्या आठवणीने दाटून येतात.... आठवणी ??? प्रश्न पडला असेल ना... कि मी तुला पाहिले नाही भेटले नाही आणि मग आठवणी कुठून आल्या ???

अरे वेड्या...तुला माझी आठवण येत नाही पण मी मात्र नेहमीच कल्पनेच्या जगात तुझ्या बरोबरच असते... सकाळी उठल्यावर सूर्याच्या कोवळ्या किरनामध्ये तुला पाहण्याचा अतोनात प्रयत्न  करते...

दारासमोर रांगोळी काढताना आज नक्कीच  तुझे स्वागत होईल असा एक विश्वास जपून ठेवते... दुपारी रखरखत्या उन्हात चालताना तुझ्या प्रेमाच्या सावलीचा आभास साठवून ठेवते.....

संध्याकाळी खिडकीत उभे राहून त्या मावळत्या सूर्याकडे पाहत असताना मन अजून अधीर होवून जाते.... तू माझ्या सोबतच आहेस हा खेळ उगाचाच रोज खेळत राहते... आणि मन कातर होवून जाते.....

रात्री त्या चंद्राला पाहिले कि आपसूकच डोळ्याच्या नकळत पापण्याचे ढग सारून मेघ बरसू लागतात... ओठ थरूथरू लागतात... आवंढा गिळत कसे तरी स्वतःला सावरण्याच्या प्रयत्नात तुला आठवू लागते

भीती वाटते रे... ओठावरील शब्द ओठावरच विरून तर जाणार नाहीत ना ... मनातील प्रेम मनातच आटून तर जाणार नाहीत ना..... भावना कायमच्या निशब्द तर होणार नाहीत ना.. तू का माझ्याशी बोलत नाहीस.... 

सोळा श्रींगार करून सुद्धा माझे सौंदर्य खुलत नाही कारण त्यावर तुझ्या नजरेचे काजळ नाही.... आरशात पाहून सुद्धा स्वतःचे प्रतिबिंब अपूर्ण दिसते.... डोळ्यातील अश्रुंचे थेंब गालावरून हाताच्या तळव्यावर पडून तळे  साचले आहे रे... मग कधी वाटत तेच साचलेले तळे तुला दाखवावे.... माझ्या प्रेमाची उत्कंठा तुला कळेल का??? आता मी ठरवलेच आहे... नाही तुझी वाट पाहणार.... तुला यायचे तेव्हा ये.... पण हो एक लक्षात ठेव... ह्याला प्रेमाची धमकी   म्हणलास तरी चालेल मला... पण तुला मी खूप मारणार आहे... तुझ्याशी रुसवे धरणार आहे... तुला पण खूप त्रास देणार आहे... मला वेडाबाई म्हण वेधली   म्हण चालेल मला .. पण तुझ्या हे शब्द ऐकण्यासाठी नक्कीच तुझी वाट पाहेन.... येशील ना रे...... ???